Актуелен директор на агенцијата за финансиска поддршка во земјоделството земал мито, а парите му ги дал поранешен министер за правда и локална самоуправа уште во владата на Љупчо Георгиевски a а сега управител на фирма. Обвинителството за гонење на организиран криминал и корупција откри дека имале тројца посредници меѓу кои и вработени во министерството за земјоделство и УЈП. Поткупот бил за фирма која не исполнува услови да земе пари од ИПАРД.
Му ветувале 50 илјади евра, а полицијата го фатила со првите 400 дадени на рака на директорот на Агенцијата за финансиска поддршка во земјоделството Илија Стоилев.
Ова се деталите кои ги откриваат обвинителството и полицијата за вчерашната акција во која се уапсени петмина. Истрагата утврдила дека на актуелниот директор митото му го нудел, ветувал, а првите 400 евра и му ги дал поранешниот министер за правда и локална самоуправа во владата на Љупчо Горѓиевски, Џевдет Насуфи. Поткупот требало да биде за пари од ИПАРД програмата да добие фирмата каде Насуфи е управител, иако не ги исполнувала условите кои се барале во огласот распишан од агенцијата.
Инаку според истрагата уапсени се петмина, меѓу кои вработен даночен референт во УЈП и државен службеник во Министерството за земјоделство. Првообвинет е ексминистерот Насуфи за давање поткуп и давање награда за противзаконито влијание.
Во централниот регистар тој се јавува како управител во фирмата СИГНАС-АГРО во Струшко Велешта. Директорот на агенцијата пак Стоилев е осомничен за примање поткуп. Тој е претседател на општинскиот комитет на ВМРО ДПМНЕ во Свети Николе а пред да стане директор на агенцијата бил советник во подрачната единица на министерството за земјоделство.
Премиерот Христијан Мицкоски ваквото однесување на директорот го оцени како девијантно. Останатите тројца примање награда за противзаконито влијание. За сите обвинителството предложи притвор.
Билјана Николовска
Дигитална обработка: T.Д.