Владата на Шведска одлучи да ја „прилагоди поддршката“ за Србија во рамки на Стратегијата за партнерство за реформи на Шведска со Западен Балкан и Турција, објавено е на веб-страницата на шведскиот парламент. Таа одлука значи дека делови од поддршката за државните институции во Србија ќе бидат суспендирани и дека поддршката ќе биде фокусирана во поголема мера на зајакнување на граѓанското општество.
„Развојот во Србија оди во погрешна насока. Ова важи за сè – од растечката корупција до непочитувањето на владеењето на правото. Земјите не можат да очекуваат шведска поддршка ако не ги спроведат реформите и развојот што ги очекуваме. Затоа ги воведуваме овие промени сега“, рече шведскиот министер за развојна помош и надворешна трговија, Бенјамин Доуса.
Шведската влада внимателно го следи развојот на ситуацијата во Србија и долго време забележува недостаток на реформска волја кај српската влада.
„Ова е особено поврзано со спроведувањето на принципите на владеење на правото, борбата против корупцијата и заштитата на основните слободи и права, како што се слободата на изразување и слободата на медиумите. Имајќи го ова предвид, владата одлучи да ја преиспита поддршката за Србија, во согласност со принципите на проширување на Европската унија врз основа на заслуги. Ова значи дека земјите што напредуваат и покажуваат волја за реформи се наградуваат, додека поддршката може да се намали или замрзне за земјите што не ги почитуваат основните права или заостануваат во демократскиот развој. Затоа, владата одлучи да ги суспендира одредени форми на поддршка за српската држава и да ги пренасочи средствата кон зајакнување на граѓанското општество“, се наведува во соопштението на Владата на Шведска.
