Хјустон ја прекина губитничката низа од 15 порази по ред против Голден Стејт и утринава славеше со 91-90 за да се пласира во полуфиналето во НБА-купот.
Џејлен Грин погоди две слободни фрлања на 3,5 секунди до крајот на натпреварот и ја осигура победата, бидејќи Вориорс не реализираа во последниот напад. Алперен Шенгун со 26 поени и 11 скока беше најдобар во редовите на Рокетс, додека кај Вориорс најмногу се истакна Џонатан Куминга со 20 поени, а Стеф Кари имаше еден помалку. Во полуфиналето во сабота во Лас Вегас, Хјустон ќе ги одмери силите со Оклахома.
Атланта го победи Њујорк во „Медисон Сквер Гарден“ со 100-108 за место на завршниот турнир во Купот. Тре Јанг имаше 22 поени и 11 асистенции за Хокс, Деандре Хантер имаше 24 поени, а Џејлен Џонсон 21 поен и 15 скока. Џош Харт со 21 поен беше најефикасен во редовите на Никс.
Во полуфиналето, Атланта ќе се соочи со Милвоки.