Половија од буџетскиот дефицит, од 3,4 процентни поени, 1,7 ќе отидат на отплата на камати во 2024 година, рече универзитетскиот професор при УКИМ, Трајко Славески во вечерашното издание на „Вин-Вин“ на ТВ Телма.
„Остар беше падот како резултат на пандемиската рецесија, втора рецесија што ја доживеавме во последните десетина години, по онаа од 2007 година и од 2009 година. Од владини претставници слушаме дека ова била најжестоката, најдлабоката рецесија во македонската економија, што не е точно. Најдлабоката беше со раздружувањето на некогашна СФРЈ, кога шест-седум години ние имавме негативни стапки на раст кои некогаш беа и двоцифрени“, истакна Славески.
Според него, добро е што кратко траеше и заздравувањето на глобалната економија, на европската и на македонската.
„Тоа е како топче кога ќе падне и ќе отскокне. Но, податоците за растот на македонската економија се малку загрижувачки, затоа што од година во година гледаме дека стапката на раст се повеќе и повеќе се намалува. Различни беа причините и за настанокот на тогашната криза и за оваа сега. Добро е што ќе немаме онаа рецесија со двојно дно, заздравување, па повторен пад на економијата во рецесија, но, некако, се наоѓаме во состојба на стагнација“, вели Славески.
Како што додаде, не е постигнат ниту потенцијалот за раст на македонската економија и, според некои мерења и консензус меѓу економистите, се што е под четири проценти раст на бруто домашниот производ е нешто што сме можеле да го постигнеме според ресурсите со кои располагаме, но не го постигнуваме.