Нов колапс во американскиот банкарски сектор. Регулаторите ја затворија Првата Републичка банка, со седиште во Сан Франциско, и сите нејзини депозити и поголем дел од имотот се продадени на Џи-Пи Морган, во обид за спречување на натамошни банкарски превирања во земјата. Таа е трета банка од средна големина која пропаѓа во САД во последните два месеца, по Банката на Силиконската долина од Вашингтон и Сигнејчр банката од Њујорк.
Банкарскиот гигант Џи-Пи Морган ќе преземе 173 милијарди долари заеми и околу 30 милијарди долари обврзници, како и 92 милијарди долари во депозити. Во соопштението на Џи-Пи Морган се наведува дека нема да ги преземе долговите, ниту преференцијалните акции. По преземањето, акциите на Џи-Пи Морган пораснаа за 2,6 отсто, додека вредноста на акциите на Првата републичка банка паднаа за 96 отсто од почетокот на годината.
Првата Републичка банка на 13 април располагаше со имот од 229 милијарди долари, но инвеститорите и штедачите стануваа се позагрижени од информациите за високиот износ на неосигурани депозити и изложеноста на заени со ниска каматна стапка.
Федералната корпорација за осигурување на депозити денеска соопшти дека 84-те филијали на Првата Републичка Банка во осум американски држави повторно ќе бидат отворени, а штедачите ќе имаат целосен пристап до нивните депозити и преку филијалите на Џи-Пи Морган
Сашко Димовски