Наместо да го покаже договорот со „Бехтел и Енка“, вицепремиерот Груби се заколна дека никој нема да краде додека се градат автопатиштата. Како залог ја стави сопствената слобода, но и слободата на премиерот и останатите министри вклучени во проектот.
За Груби, ова е опозициска хајка за дневна политика. Го повтори тврдењето дека пред донесувањето на специјалниот закон и измените на другите закони, што се однесуваат на работата на коридорите 8 и 10-д, се сретнал неколку пати со Христијан Мицкоски, но и со потпретседателите Владо Мисајловски и Александар Николовски.
Од ВМРО-ДПМНЕ одговорија дека е добро што Артан Груби е свесен дека ќе лежи во затвор и дури и сам си ја одреди и висината на казната.
Од партијата се противат на спорните делови од договорот поради кој се менуваат суштински закони и според нив, се отвора простор за криминал, како и преземената обврска да се плаќаат милионски пенали. Тие веќе објавија делови од договорот и бараат, доколку не се во право, владата да ги демантира и да го стави договорот на увид на јавноста и експертите.
Далиборка Демјанска Цветановска