Ќе можат ли „Бехтел и Енка“ да копаат и експлоатираат минерални суровини каде сакаат и кога сакаат? Опозицијата вели – да, мнозинството негира. Пратениците од ВМРО-ДПМНЕ се обидуваат со амандмани да ги спречат измените на законот, со кои се скратуваат процедурите за добивање на концесии на две недели од поднесување на барањето и се дозволува експлоатација на минерални суровини и шест месеци по завршувањето на изградбата на автопатите.
Мнозинството тврди дека сепак ќе има заштитни механизми.
Предлагачите на измените, пратениците од ДУИ, овој проект го претставуваат како национален проект на Албанците и обвинуваат дека, токму затоа опозицијата е против.
За опозицијата ова е неприфатлива замена на тези. Ги потсетија ДУИ дека проектот не е само на Албанците, туку е стратешки проект на цела Македонија, а автопатите ќе ги користат сите.
Овој закон е еден од осумте спорни закони кои треба да се изменат со образложение дека ќе ја забрзаат изградбата на автопатите.
Далиборка Демјанска Цветановска