Макс Ферстапен беше најбрз во квалификациите за трката за Големата награда на Австралија што се одржаа утринава во Мелбурн на патеката „Алберт Парк“. Мерцедес покажа добра форма, но Ферари очигледно е далеку од борбата за победа.
Актуелниот светски шампион оствари време од 1:16,732 минути за да ја освои пол-позицијата. Зад возачот на Ред Бул ќе стартуваат двата Мерцедеси, бидејќи Џорџ Расел имаше второ најдобро време во квалификациите, а потоа следува Луис Хамилтон. Четвртото место е резервирано за Фернандо Алонсо од Астон Мартин, а зад него е сонародникот Карлос Сајнц од Ферари. Помеѓу најдобрите десет се и Ленс Строл, Шарл Леклер, Александер Албон, Пјер Гасли и Нико Хулкенберг.
Серхио Перез од Ред Бул ќе стартува од последното место откако денеска излета од патеката уште во првата квалификациска сесија предизвикана од механички проблем со болидот.
Трката за Големата награда на Австралија е закажана за утре наутро во 7 часот по средноевропско време.