Неколку полицајци реагираа до Телма и тврдат дека утрово кога биле на лекарски и на стоматолошки прегледи им било кажано дека немаат уплатено здравствено осигурување поради што прегледите и интервенциите мора да си ги платат само на приватно без употреба на парите од Фондот за здравствено осигурување.
За случајот потврдуваат и од Независниот синдикат на полицијата кои побараа МВР да го реши проблемот и да ги врати парите на полициските службеници. Особено е проблем и што без здравствено осигурување се и децата кои се осигурени преку родителите-полицајци.
-Во текот на 24.08.2022 год. на мејловите на телефоните на Независниот Синдикат на Полицијата, пристигнаа повеќе од 50-тина известувања како поплаки по барање совет како да се справат со некои од вечните Неработници кои се по удобните канцеларии во седиштето на МВР. Денеска повеќе 10-тина вработени во полицијата приватно платија за прегледи, неколку од нив и за систематски прегледи за првачиња, за деца на полицајци кои треба да бидат запишани во прво одделение во учебната 2022/23 год, соопштија од НСП.
Од МВР велат дека се е платено и проблемите се надминуваат.
-За сите вработени во Министерството за внатрешни работи се уплатени придонесите во законски утврдените рокови, но настанат е проблем при пријавување на лице за кое ретроактивно се уплатени придонеси за социјално осигурување, а кое било вратено на работа со судска пресуда откако претходно му бил прекинат работниот однос. МВР веднаш презеде мерки за решавање на проблемот и во координација со Фондот за здравство и УЈП проблемот ќе биде надминат во најскоро време, одговорија од МВР.