Луис Хамилтон славеше на трката за Големата награда на Катар во Формула 1 шампионатот и го намали водството на Макс Ферстапен во генералниот пласман. Возач на денот беше ветеранот Фернандо Алонсо.
Возачот на Мерцедес водеше во текот на целата трка и без проблеми го чуваше своето водство до финишот. Возбудувањата беа зад него, а втор финишираше Макс Ферстапен иако возачот на Ред Бул мораше добро да се помачи, бидејќи пред стартот беше казнет со пет позиции и трката ја почна од седмото место. Фернандо Алонсо со болидот на Алпин заврши на третата позиција. Поранешниот светски шампион се искачи на победничкиот подиум за прв пат по цели седум години.
Поени освоија и Серхио Перез, Естебан Окон, Ленс Строл, потоа двајцата возачи на Ферари, Карлос Сајнц и Шарл Леклер, Ландо Норис и Себастијан Фетел.
Во генералниот пласман Ферстапен на врвот има 351,5 бодови, осум повеќе од Хамилтон. До крајот на сезоната остануваат уште две трки, а следната се вози во Саудиска Арабија на 5.декември.