Женската ракометна репрезентација на Македонија со дуелот против Црна Гора во Скопје ги почнува подготовките за настап на Европското првенство што ќе одржи следната година, а една од домаќините е и нашата земја.
Дуелот со една од најдобрите селекции на Стариот континент сигурно дека е огромен предизвик за македонските ракометарки, но и одлична можност за дополнително искуство кое и тоа како и е потребно на оваа селекција која е одличен спој на младост и искуство.
“За нас е голем предизвик да играме со Црна Гора која е во самиот врв на светскиот и европскиот ракомет. Најважно за нас е што немаме што да загубиме, овој натпревар е вистинска можност да видиме до каде сме, што треба да поправиме во нашата игра, а тоа е што е добро да го кренеме на уште повисоко ниво. Имаме мотив да одиграме добро, да се прикажеме во најдобро светло. Квалитет во оваа селекција има и со овие мечеви само можеме да го подобриме нивото на нашата игра”, изјави Симона Стојковска.
Натпреварот во А1 Борис Трајковски арената почнува во 20 часот и 15 минути, а влезот за сите гледачи е слободен. Според протоколите во нашата земја дозволено е исполнување на капацитетот на трибините од 30%.
ФОТО: Игор Паневски