Вардар нема да игра на завршниот турнир во СЕХА-лигата во Задар поради еден позитивен ракометар на ковид-19. Нашиот шампион вчера го елиминираше Загреб во четвртфиналето, но нема да може да се бори за титулата регионален шампион.
Иако Вардар на теренот се избори за место на 10-тиот фајнл-фор турнир во СЕХА-лигата, сепак Загреб ќе го заземе местото на нашиот шампион во Задар и во полуфиналето ќе игра против Брест Мешков.
Во таборот на „црвено-црните“ имало еден позитивен ракометар на ковид-19 на тестирањето, кое било спроведено од хрватските власти вчера пред реванш четвртфиналниот натпревар со Загреб. Позитивното лице веднаш е изолирано, како и оние со кои имал контантакт, а постои и опасност од ширење на вирусот помеѓу целиот тим, па поради тоа Вардар е исклучен од натпреварувањето, соопштуваат од СЕХА, кои се повикуваат на препораките од Европската унија.
Вардар на домашен терен го совлада Загреб со четири голови разлика, а синоќа загуби со три на реваншот и спортски се пласираше на завршниот турнир. Сепак, ковид-19 и СЕХА-лигата не дозволија нашиот тим да се бори за шестата титула регионален шампион.
