Адора и ЕСМ постигнаа договор за топланите Исток и Запад, дознава Телма. Договорот меѓу двете компании ќе важи од 1 октомври до 30 април наредната година.
Склучен е договор за закуп до крајот на грејната сезона. Според информациите на Телма, по разговорите задоволни излегле двете страни, а во меѓувреме, ако Адора достави и понуда за купопродажба на топланите до ЕСМ, истата ќе се разгледува и одлучува по неа во наредниот период.
АД ЕСМ и АДОРА постигнаа договор за закуп на топланите во сопственост на АДОРА, кои ќе се користат од страна на АД ЕСМ во процесот на обезбедување парно греење за градот Скопје. Договорот за закуп е со трајност за времетраење на грејната сезона 2022/23г. Закупнината е дефинирана според постоечката цена утврдена од РКЕ. Двете компании покажаа општествена одговорност и свесност за моментот во однос на потребите на граѓаните на Скопје и постигнат е договор сите прашања кои претставуваа предмет на дискусија да се апсолвираат во следниот период, соопштија од ЕСМ.
По постигнатиот договор со Адора, од утре ЕСМ ги става на располагање сите капацитети и од 15 октомври ќе го вклучи парното греење.