Вака изгледа графичкиот приказ на исполнетите ветувања на владата на половина од мандатот. 40% од ветувањата кои ги дала владата остануваат неисполнети, а 4 проценти се во спротивна насока, за 7 отсто од ветувањата нема податоци. Целосно исполнети се 13 отсто, а во насока на исполнување 37 проценти. Ова го покажуваат податоците на дигиталната платформа „КОМПАС“ кои го следеле исполнувањето на владините ветувања.
„ Во социо-економскиот дел следиме 44 ветувања, од нив само 36% имаат позитивна траекторија, 11% се целосно реализирани и 25% се во насока, во спротивно на 64% кои стагнираат или одат во спротивна насока“, кажа Благица Петрески, од Фајнс Тинк.
Најмногу исполнети ветувања има во образованието, најмалку во социјалната политика, а ниту едно ветување не е исполнето во однос на родовата еднаквост. Во здравството и младинските политики има одредени поместувања.
„Од следени 38 мерки исполнети се 12, а во насока на исполнување се 22 мерки, 2 не се исполнети, а за 2 од мерките нема податоци“, рече Ана Мицковска Ралева, Македонски центар за граѓанско образование
„Од вкупно 31 мерка што следиме, целосна реализација има на 4, 2 се делумно реализирани, 2 се во фаза на реализација. Највидливи резултати има во кадровска политика и подобрување на пристапот до одредени здравствени услуги“, рече Кирил Солески, Македонско лекарско друштво
„Следиме 31 ветување, од нив во текот на овие две години се исполните 4, а 5 се во насока на исполнување, додека 22 се воопшто нереализирани“, вели Ристо Савески, Младински образовен форум
Резултатите покажуваат дека иако кај дел од владините ветувања е забележан напредок, сепак значителен број мерки се уште немаат видлива реализација или се движат со побавно темпо од предвиденото.
Тамара Марковска