Околу 100 текстилни работнички и работници од кочанската конфекција „Артекс“ останаа без работа, две плати и неисплатено К-15. Во текот на вчерашниот и денешниот ден им биле дадени да потпишат спогодбени отказни договори. Работничките со солзи во очи велат дека ова за нив е шок, бидејќи некои од нив во оваа конфекција работеле и над две децении.
„Тука работам, со две операции сум и сега сум на улица. Немам ни здравство ни ништо, каде да отидам јас. Две плати, К-15 и не ме следува ништо, дека да идам“, вели работничка од кочанската конфекција „Артекс“.
„Звоне телефонски кажува фирмата крај, пари нема, кој шок е тоа, две плати и К-15, оттука деца ранеме, сметки, кредити се и сешто. Лани декемврската 15.000 илјади денари беше пуштил“, рече друга работничка.
Текстилните работници откако ги добија спогодбените отказни решенија ги стуткаа и ги фрлија пред фабриката. Порачаа дека нема ги потпишат и покрај најавата дека во понеделник со адвокат ќе им се дадат откази.
„Ние не сме толку глупави и со осмо и со средно, тоа ние да го потпишеме невалидни документи“, додава трета работничка.
„Значи ако те следува од државата два-три месеца да не можеш да ги земеш. Зошто спогодбено нека ти даде отказ,нека ти даде платите, нека те ставе под Бирото. Нека каже жени фирмата нема работа до денеска, а ние како работници треба да му најавеме на него еден месец порано, кога ќе напуштеме, а он у 15 за 2 плата немаме. Затвара се фирмата на шо иде тоа“, додава четврта работничка.
„Друго можам да кажам јас сам бил у
синдикатот, лани потпиша на празен лист. Потпиша се, нема К-15. Превари не дадени 15.000 како регрес, 15.000 плата. Тогаш се затрајаме“,истакна работник.
Работниците ги повикаа институциите и инспекторите да ги заштитат и да им помогнат. Телма се обиде да ја слушне страната и на менаџерскиот тим на кочанската конфекција „Артекс“, но на телефонскиот број кој е наведен на страниците за бизнис компании не беа достапни.
Викторија Димитрова Јованова
Дигитална обработка: T.Д.