Во политичката дискуција, за жал, СДСМ повеќе не може да ја третираме според улогата што ја има, туку според степенот на штетата што ја прави врз сите политички процеси, вклучително и со нејзиното нечинење на политичката сцена, рече Никица Корубин, аналитичарка и поранешна пратеничка, во вечерашната дебата во „Вин-Вин“ на Телма ТВ.
„Ние имаме втор последователен изборен циклус, парламентарните и претседателските пред година и пол и сега локалните избори, каде што практично како СДСМ да беше отсутна од изборниот циклус. Формално, фактички беше присутна и го заземаше просторот, потенцијалниот, глумеше избор што евентуално гласачите би го имале наспроти ВМРО-ДПМНЕ, наспроти ЗНАМ, наспроти Левица, ама де факто избор не постоеше. Де факто суштина и срж не постои“, смета Корубин.
Мнозинската волја на локалните избори, според неа, е неизлезноста.
„Педесет и еден посто е неизлезноста, ние зборуваме за малцинската волја. Тоа, нормално, во демократија не значи дека избраните немаат легитимитет, не значи дека не треба да им се честита на успехот и не значи дека добро го одиграле тоа, меѓутоа ова е само продолжение, вклучително и улогата што ја има СДСМ, само што е дискутабилна според мене и веќе сериозно проблематична“, вели Корубин.
С.Д.