По шест години, повторно се менува списокот на лектири за учениците од второ до деветто одделение. Учениците ќе имаат повеќе книги за читање, особено во пониските одделенија. Така, второодделенците наместо досегашните две задолжителни лектири ќе имаат три, меѓу кои и „Сказни“ од Браќата Грим, а ќе треба да изберат и една повеќе од изборните.
Во трето одделение исто така се додава нова задолжителна книга, додека во повисоките одделенија бројот на лектири останува ист, но со промена на статусот – некои задолжителни стануваат изборни и обратно.
Од Министерството за образование и наука велат дека измените се прават затоа што учениците се помалку покажуваат интерес за читање на постојните лектири, кои често им биле тешки за разбирање.
- „Преку лектирите треба да развиваат и одредени вештини. Во лектирите кои се предложени сега се промовираат училишна средина, пријателство, идентитет, култура, однос кон родители, однос кон деца со попреченост“, изјави Весна Јаневска, министерка за образование и наука.
Министерството за образование и наука и Бирото за развој на образованието започнаа јавна расправа за новиот предлог-список. Расправата ќе трае до крајот на ноември. По нејзиното завршување, Бирото за развој на образованието ќе ги анализира пристигнатите предлози и ќе ја предложи финалната листа која би можела да се применува од наредната учебна година.
- „Новиот пристап при изборот на лектирите се темели на неколку критериуми: програмска усогласеност, соодветност на возраста, книжевна вредност, тематска релевантност и инклузивност“, соопштија од Биро за развој на образованието.
Последните измени во списокот на лектири беа направени во учебната 2019/2020 година. Од тогаш, наставници и родители повеќепати реагираа дека дел од делата се застарени и премногу сложени за возраста на учениците.
Тамара Марковска