Она што ги дефинира веќе наредните парламентарни избори е далеку подоброто позиционирање на „Влен“ како коалиција во однос на ДУИ и опозицијата која што настапуваше како АКИ, нагласи Имер Селмани, поранешен пратеник во Собранието, во вечерашната „Топ тема“ на ТВ Телма.
„И самите Влен можеби ќе беше презадоволен со плус едно освоено градоначалничко место, меѓутоа оваа убедлива победа од повеќе од 2:1 во однос на освоени градоначалнички места за нив, се разбира дека е огромна победа која што ги гаси сите дилеми, не само кој е победник, туку и околу легитимитетот на продолжување на учеството во владата и владината коалиција. Меѓутоа и на она што беше најавено како референдум дека на овие избори, во зависност од резултатите кај албанскиот политички кампус, ќе има или ќе нема предвремени избори. Гласачите на некој начин рекоа, „дајте, продолжете, направете добри дела таму каде што победивте, ве задолжуваме дупло, затоа што сега сте ина централно и на локално ниво и сето тоа што го ветивте е време да го исполните“, изјави Селмани.
Одговорноста на Влен, истакна Селмани, сега е огромна, но паралелно со тоа, смета дека ќе следува и нивно внатрешно организирање, бидејќи, како што рече, „внатре во коалицијата има двајца лидери кои ја потврдија својата моќна позиција со победите на Изет Меџити во Скопје (Чаир) и на Билал Касами во Тетово.
С.Д.
