Вечерва повеќе српски телевизии објавија емисија на која според објаснувањето се слушаат политички активисти и студенти како разговараат за план на саботните протести да освојат државни објекти и зградата на националниот ТВ сервис РТС.
Аудио снимката трае околу два часа и најверојатно е направена на состанок во Нови Сад.
На неа се слуша како активистите разговараат за протестите и како да делуваат при различен развој на состојбата, доколку протестите се мирни, бидат напнати (на раб) или се насилни.
Владеачката коалиција и српскиот претседател Александар Вучиќ соопштија дека станува збор за обид за пуч и предизвикување на граѓанска војна. Најавија дека сите инволвирани во креирање на планот ќе бидат правно гонети и санкционирани.
Во сабота на 15-ти март, во Србија се организираат големи протести на српските студенти и незадоволни граѓани од владеењето на Вучиќ. Протестите почнаа во ноември по трагедијата во Нови Сад каде падна натстрешница на зградата пред Железничката станица и загинаа 15 луѓе.