Германија започна денеска со процедурата за прекинување на работата на трите преостанати нуклеарни централи, како дел од планираната транзиција кон обновливи извори на енергија, што беше прославено од еколошките активисти.
Затворањето на реакторите во Емсланд, Некарвестхајм 2 и Исар 2, кое било договорено пред повеќе од 10 години, со внимание беше следено надвор од германските граници.
Повеќедецениските анти-нуклеарни протести во Германија, засилени од нуклеарните катастрофи во Чернобил и Фукушима го зголемуваа притисокот врз повеќето германски влади да престанат да ја користат технологијата, која според критичарите, не е безбедна и одржлива.
Еколошките групи го одбележаа денот со прослави пред трите реактори и со собири во поголемите градови, вклучувајќи го Берлин.
Бранителите на атомската енергија, тврдат дека фосилните горива треба да престанат да се употребуваат како дел од глобалните обиди да се спречат климатските промени, тврдејќи дека нуклеарната енергија произведува далеку помалку емисии на стакленичките гасови и доколку правилно се управува со неа, исклучително е безбедна.
Земјите како Соединетите американски држави, Јапонија, Кина, Франција и Велика Британија сметаат дека нуклеарната енергија треба да ги замени фосилните горива кои ги засилувааат климатските промени.
Германската одлука да престане со употребата и на фосилните горива но и на нулеарната енергија е пречекана со скептицизам во овие земји, свесни дека ваквата постапка на најголемата економија во Европа би можела да ја загрози употребата на технологијата која се опишува како еколошка и сигурна алтернатива на фосилните горива.