На Светското фудбалско првенство 2026 утринава се комплетираа натпреварите од првото коло во групите Г и Х. Тоа беше вечер на ремија, бидејќи сите четири дуели завршија без победник.
Најголемото изненадување го приреди дебитантот Зеленортски Острови, кој во Атланта го запре европскиот првак Шпанија и одигра 0-0 во рамките на групата Х. Шпанците доминираа и имаа повеќе шанси, но не успеаја да го скршат отпорот на аутсајдерот, кој го освои првиот бод во својата мундијалска историја.
Нешто подоцна, Уругвај не успеа да ја победи Саудиска Арабија и исто така освои само еден бод по ремито 1-1. Саудијците поведоа со голот на Абдулела Ал-Амри во 41-та минута, додека Уругвај се спаси од пораз преку Максимилијано Араухо во 80-тата минута.
И во групата Г немаше победник. Белгија ремизираше 1-1 против Египет во Сиетел. Емам Ашур погоди за египетската репрезентација во првото полувреме, а Белгијците до бод стигнаа во 66-тата минута, кога Мохамед Хани си постигна автогол по притисокот на Ромелу Лукаку.
Возбудливо реми одиграа и Иран и Нов Зеланд, чиј дуел заврши 2-2. Новозеланѓаните двапати водеа со головите на Елајџа Џаст во седмата и 54-тата минута, но Иран двапати се враќаше во натпреварот преку Рамин Резаеиан и Мохамад Мохеби.