Над еден милион Филипинци се евакуирани во засолништа додека Супертајфунот Фунг-вонг, најмоќната бура што ја погодила земјата годинава, беснее над нејзиниот североисточен брег. Со ветрови што достигнуваат и до 230 километри на час, овој џиновски циклон со појас од дожд и ветрови широк 1.600 километри се заканува да покрие две третини од архипелагот.
По разорниот Тајфун Калмеги, кој само пред неколку дена однесе над 200 животи, Фунг-вонг доаѓа како нова катастрофа врз земја веќе осакатена од поплави, лизгања на земјиштето и прекин на снабдувањето со електрична енергија.
Врз основа на најновата метеоролошка сателитска снимка направена во 5 часот наутро, тајфунот Уван (Фунг-вонг) стана супертајфун кој сега го погодува западниот дел од Филипините кон источниот дел од копнената маса Лузон информира метеорологот Мунир Балдомеро.
Претседателот Фердинанд Маркос Џуниор прогласи вонредна состојба, повикувајќи на итна евакуација од ризичните области.
Всушност, им наредивме да одат тука во зоната за евакуација синоќа, особено децата, постарите граѓани, лицата со попреченост и бремените жени, информира Џоел Меркадо, локален службеник.
Над 30 милиони луѓе се потенцијално изложени на ризик од бурата. Училиштата и државните канцеларии се затворени, над 300 летови се откажани, а повеќе од 6.000 патници се заглавени во пристаништата.
На прагот на климатскиот самит COP30 во Бразил, Фунг-вонг е силен потсетник дека планетата веќе плаќа цена за неодложените климатски акции.
Бидејќи климатските промени сè уште се забрзуваат и ни треба драстично намалување на емисиите за да можеме да го одржиме порастот на температурата во рамките на 1,5 степени. На работ сме да ги изгубиме овие битки, порача генералниот секретар на ОН, Антонио Гутереш.
И додека Филипините се борат со ударите на природата, во Нигерија и Пакистан, земјоделците остануваат без вода; во Европа, топлотен бран однесе 1.500 животи.
Сите овие случувања се резултат на климатските промени, бидејќи во претходните години не можевме да замислиме дека реките ќе пресушат, но сега поради климатските промени тие се суви. Сигурно, сите луѓе таму, некои од нив, ја пресметале загубата пред неколку години кога реките се исушија бидејќи немаат алтернатива за наводнување освен реката, раскажува земјоделецот Насиру Бело.
Имавме многу мал принос, а времето беше жешко оваа зима. На земјата ѝ недостасува вода. Оваа сезона е слаба; може да се нарече половина сезона, вели локалниот земјоделец Мансур Махмуд ал-Хатиб.
Фунг-вонг не е само уште еден тајфун. Тој е одговор на времето во кое живееме — време кога секој бран, секој пожар и секој пороен дожд се потсетник дека климата веќе се промени.
Александар Петрески