Српската „Алта банка“ чека зелено светло за да даде понуда за преземање до 100 проценти од обичните акции на „Стопанска банка Битола“. Компанијата соопшти дека понудата за преземање ќе биде дадена по цена од 3.777 денари по акција.
„Во добиеното известување стои дека согласно член 26-а од Законот за преземање на акционерски друштва, покрај согласностите од домашните тела и институции вклучувајќи, но не ограничувајќи се на претходна согласност од Народната банка на Република Северна Македонија, понудата е условена и со претходно одобрување на концентрација од страна на Комисијата за заштита на конкуренцијата на Република Србија (Странско одобрение). Доколку странското одобрение не биде добиено, намерата ќе се смета за повлечена и нема да биде дадена понуда за преземање“, се наведува меѓудругото во соопштението на Македонска берза.
„Алта банка“ заедно со поврзаните лица веќе поседува 19.439 обични акции или 4,97 проценти од вкупниот број на обични акции издадени од „Стопанска Банка Битола“.