Македонската ракометна репрезентација денеска од 18 часот игра контролен натпревар со Србија во Стара Пазова со што ќе го заокружи првиот дел од подготовките за настап на Светското првенство што во јануари се одржува во Хрватска, Данска и Норвешка.
Избраниците на селекторот Кирил Лазаров веќе една недела работат напорно во Стара Пазова, Србија, а одиграа и две контролни средби. Македонија ги победи Динамо Панчево и Нови Београд во натпревари кои се играа по 90 минути, односно три полувремиња по 30 минути. Денеска нашиот тим ќе ги одмери силите и со селекцијата на Србија иако првично имаше закажано дуел со Саудиска Арабија.
Македонија утре ќе одработи уште еден утрински тренинг во Стара Пазова, па тимот ќе се врати во Македонија, а селекторот Кирил Лазаров на играчите ќе им даде мал одмор за новогодишните празници. Потоа тренинзите ќе продолжат во Скопје до 7.јануари, кога тимот ќе замине за Хрватска и ќе одигра пријателски дуел со ко-домаќинот на Мундијалот.
Последниот дел од подготовките ги одработи во Вараждин, каде и ги играме натпреварите од групата Д на Светското првенство. Првиот дуел е закажан за 15.јануари против Унгарија, два дена подоцна играме со Холандија, а во последното коло ќе се соочиме и со Гвинеја на 19.јануари. Првите три репрезентации ќе обезбедат место во главната фаза на Мундијалот, а последнопласираната селекција продолжува во Президент купот и ќе разигрува за пласман од 25.место до 32.место.
