Фудбалскиот клуб Работнички направи нова промена во стручниот штаб сезонава по серијата лоши резултати. Гоце Седлоски заминува од клупата, а на негово место доаѓа Горан Станиќ.
„Романтичарите“ денеска го назначија третиот тренер сезонава. Слабите резултати придонесоа за тренерска вртелешка во Дебар Маало. Сезоната ја почна Милан Илиевски, па на негово место на клупата седна Гоце Седлоски. По четирите порази во низа, челниците на Работнички решија спогодбено да го раскинат договорот со поранешниот македонски репрезентативец и на негово место го назначија Горан Станиќ.
Поранешниот селектор во младинските репрезентации на Македонија сезонава веќе го водеше Работнички на два натпревари како привремен тренер по отказот на Милан Илиевски, кога тимот оствари и две победи против Македонија Ѓорче Петров и Силекс.
Сега тој целосно ја презема работата со првиот тим, а дел од стручниот штаб на Станиќ ќе бидат и Бојан Марковски и Баже Лазаревски.
Работнички моментално се наоѓа на осмата позиција на табелата во Првата лига со 27 бодови, само пет повеќе од последнопласираната Македонија Ѓорче Петров.