Макс Ферстапен ќе стартува од пол-позицијата на утрешната трка за Големата награда на Австралија во Формула 1 шампионатот. Карлос Сајнц имаше фантастичен настап во квалификациите иако пред две недели имаше операција, а казна заработи Серхио Перез.
Ферстапен ја продолжува доминацијата што веќе трае три години, па денеска на патеката „Алберт Парк“ во квалификациите оствари најбрз круг со време од 1:15,915 минути. Второ време имаше Карлос Сајнц од Ферари иако пред две недели имаше операција на слепо црево и беше под знак прашалник дали ќе биде фит да настапи во Австралија. Трето време оствари Серхио Перез, но возачот на Ред Бул доби казна од три позиции поради попречување на Нико Хулкенберг во првата квалификациска сесија и ќе стартува како шести.
Пред него ќе тргнат Ландо Норис, Шарл Леклер и Оскар Пиастри. Најдобрите десетмина ги комплетираат Џорџ Расел, Јуки Цунода, Ленс Строл и Фернандо Алонсо, додека седумкратниот светски шампион Луис Хамилтон ќе тргне од 11-тото место.
Трката за Големата награда на Австралија утре стартува во пет часот наутро по средноевропско време.
