Речиси 18 милиони евра доби ЕСМ од Владата за да може да купува гас и да произведува топлинска енергија во престојната грејна сезона. Ваква одлука донесе владата на денешната седница.
- Беше донесена одлука за одобрување 1,1 милијарда денари за набавка на енергенси, на АД за производство на електрична енергија „Електрани на Северна Македонија“, во државна сопственост, Скопје, согласно Одлуката за постоење на кризна состојба во снабдувањето со топлинска енергија, се вели во дописот од Влада
Но, за да може ЕСМ да ги грее скопјани мора да се постигне договор со Адора за топланите Исток и Запад и тогаш да ја добие третата лиценца за производство на топлинска енергија. Иако , се очекуваше Владата денеска да одлучи дали ќе ги купи топланите или ќе ги земе под закупи тоа не се случи. Според информациите договор се очекува да има во следните неколку дена. Преговорите со Адора се одолговлекоа затоа што од компанијата инсистираат да ги продадат објектите по цена колку што ги купиле лани. Владата пак повеќе е за закуп на топланите.
Во меѓувреме продлжуваат препукувањата меѓу власта и БЕГ, за тоа кој има законска обврска да испорачува греење додека тоа не почне да го прави ЕСМ. Отако вчера од Балкан Енерџи соопштија дека тие повеќе не се надлежни за тоа, вицепремиерот Битиќи возврати дека токму БЕГ имаат законска обврска да ја врши услугата. Уште еднаш потврди дека скопјани треба да бидат спокојни, зошто парно ќе има.
За време на претходната кризна состојба , ЕСМ за набавка на енергенси за топлинска енергија од Владата доби 6 милиони евра за периодот од јануари до април. Овој пат за оваа намаена сумата е повисока затоа што цената на гасот е многу поголема од онаа на почетокто на годинава.
Грејната сезона почнува за нешто повеќе од две недели, а најрано доколку има потреба парното може да биде вклучено на 1 октомври.
Ирена Чачкова