Сите шестмина переле пари за Никола Груевски да се стекне со имот на Водно. Виновни се, пресуди кривичниот суд во Скопје. Никола Груевски доби 7 години затвор, неговиот братучед Сашо Мијалков 15 месеци, бизнисменот Орце Камчев 1 година, а кумот на Груевски Ристо Новачевски и Ненад Јосифовиќ условни казни. За Ратка Камчева како управител на една „Орка“ делото е застарено. По, 9 месеци судење, материјални докази и сведоци обвинителството ја докажало шемата како поранешниот претседател на партијата на власт и премиер Никола Груевски присвоил над еден милион евра од партиската каса на ВМРО-ДПМНЕ за да купи три парцели на Водно за себе. Сториле кривични дела типичен за „белите јаки“ и бизнис светот. Добро се бранеле, дел ги признале активностите кои ги презеле, но не и кривичните дела, рече судијата Илија Трпков во пресудата.
Освен затворски казни, сега бегалацот во Унгарија, Никола Груевски останува и без становите каде што живеше на улицата „Павел Шатев“, спорниот имот на Водно кој менувал сопственици, и наводно луксузните апартмани во „Панорама резиденс“ кои му биле ветени во замена за земјиштето на Водно одлучи судечкиот совет во барањето за конфискација на имот.
Обвинителката Лиле Стефанова е задоволна од пресудата за вина и конфискацијата на имотот, но не и од висината на казните за обвинетите.
Освен Стефанова ќе се жалат и осудените. Обвинителството не ја докажала вмешаноста на Сашо Мијалков во предметот.
На Никола Груевски ова му е трета првостепена пресуда откако кривичниот суд го огласи за виновен за набавката на службен „Мерцедес“ на 2 години затвор, но и 18 месеци затвор доби за нарачувањето на шлаканици поврзани со протести пред Општина Центар. Сашо Мијалков, пак, претходно е осуден на 12 години затвор за масовно незаконско прислушување, 8 години за набавката на специјалната опрема од Израел, и 3 години за изборни измами во „Титаник 2“ , предмет кој апелациониот суд го врати на одново судење во скопска единица.
Павле Беловски