Македонската кошаркарска репрезентација вечерва од 19 часот против Швајцарија ќе го одигра третиот натпревар на претквалификацискиот турнир што се одржува во Скопје.
Доколку избраниците на селекторот Драган Бајиќ забележат победа со повеќе од пет поени разлика репрезентацијата на Македонија сигурно ќе обезбеди пласман во мундијалските квалификации.
Оптимизмот во нашите редови се поткрепува со одличната игра на последниот дуел против Словачка во кој македонските репрезентативци забележаа убедлив триумф со кој ги задржавме шансите за освојување на едно од првите две места.
И на денешниот натпревар што се игра во салата на СЦ Јане Сандански ќе биде дозволено присуство на гледачи, а влезот е дозволен само за оние кои ќе покажат сертификат за вакцинација.
