Жените знаат и умеат во рударска Македонска Каменица. Освен што се познати по единствената градоначалничка на истокот, годинава имаат шампионки и во фудбал и кошарка. Фудбалерките на женскиот фудбалски клуб Каменица Саса ги уриваат сите стеротипи, но и ги надигруваат сите противници. Двократниот шампион на Македонија ќе се натпреварува во Лига на шампиони. Натпреварите ги почнуваат на 18 август во осмата група со италијански Јувентус, еден од гигантите во светски фудбалски рамки и во женска, не само во машка конкуренција. Во групата се и Сент Полтен од Австрија, како и турскиот Бешикташ.
Македонските шампионки порачаа дека одамна фудбалот не е машки спорт. Градежни инжињери, полицајки, студентки, средношколки, програмери, економисти, правници заеднички гинат на теренот, за да топката ја сместат во противничкиот гол. Капитенот, Моника е полицаец, а Ана градежен инжињер.
Тренерот на женскиот фудбалски клуб во Македонска Каменица Зоран Златковски, поранешен фудбалер со повеќегодишна интернационална кариера, со тимот веќе ги прави тактиките за натреварите во Лига на шампиони. Фудбалерките од рударското гратче Македонска Каменица очекуваат на стадионот на Јувентус во Торино и поддршка од публиката, македонската дијаспора.Се проценува дека во Италија, само од ова градче се иселелени околу 4.000 граѓани.
Викторија Димитрова Јованова