Македонската фудбалска репрезентација денеска останува без својот капитен откако Горан Пандев објави дека денешниот меч со Холандија на Европското првенство ќе му биде последен во националниот дрес.
Капитенот на македонската фудбалска репрезентација ги изненади навивачите – денешниот натпревар со Холандија ќе биде негово збогување со националниот дрес. Нашиот најдобар фудбалер на сите времиња првично сакаше да го одигра последниот натпревар во репрезентацијата во Скопје против Германија во мундијалските квалификации, но вели дека сега е вистинскиот момент за ваков чекор.
Денешниот меч е негов 122-ри и финален во дресот на македонската репрезентација и тој останува наш фудбалер со најмногу настапи и голови. Пандев вели дека ја остава репрезентацијата во сигурни раце.