Работна група составена од експерти и стручни претставници од Владата и од претседателскиот кабинет, почнаа изработка на Закон за вонредна состојба. При конципирањето на текстот, ќе биде искористено искуството од минатогодишната вонредна состојба што ја прогласи Пендаровски, како и мислењата на универзитетскиот кадар, изнесени при денешната дебата насловена како: Вонредна состојба, научени лекции и идни предизвици.
Неопходен е Закон само за вонредна, или и за вонредна и за воена состојба. Ова беше констатирано веднаш кога минатата година државата се соочи со пандемија од светски размери, а се потенцира и сега кога опасноста не е помината.
Претседателот Пендаровски, кој потпиша вонредна состојба од 67 дена, се залага за синхронизација на сите институции и кадри кои управуваат со кризи и со вакви состојби. Објасни дека Законот за кризи е донесен 2005-та со адаптирање на драфт верзија предложена директно од НАТО.
За време на вонредната состојба, професорот Светомир Шкариќ објави дека побарал од претседателот Пендаровски да се однесува како врховен командант и да предводи војна со еден силен и непредвидлив убиец како што е короната. Побара со закон да се дефинира што е вонредна состојба и колку е слична со воената.
Универзитетските професори побараа да се прецизира какви уредби може да се носат во вонредна состојба и колку време ќе важат, но во согласност со препораките на Венецијанската комисија.
Светот се соочува со повредување на човековите права преку загрозување на правото на живот, на безбедно движење, но и на економски и социјален план. Во Судот во Стразбур веќе има и такви предмети.
Во дебатата, организирана од Претседателскиот центар за политичко образование, зедоа онлајн учество и дваесетина други професори и експерти. Ќе се искористи во конципирањето на законот, но и како подготовка на општеството за можна идна криза.
Соња Николовска