Комисијата за спречување и заштита од дискриминација поведе постапка за заштита од дискриминација за скратените часови за лични асистенти на лицата со попреченост. Комисијата ја донела одлуката на седница минатата недела. Одлуката ја споделија од Коалицијата „Менуваме“, од каде за намалените часови за лични асистенти, без медицинска реевалуација на засегнатите, чии лични податоци завршиле кај нови провајдери од Западна Македонија, информираа на прес-конфренција на 30. март. А, претходно испратиле претставка до Комисијата за антидискриминација.
Во нејзината одлука се споменува и допис од Здружението на лица со церебрална парализа од Велес, за поднесена жалба до Министерството за социјална политика, во врска со обезбедување помош и нега во домот од Центарот за социјална работа во Кавадарци.
„Се поведува постапка за заштита од дискриминација по службена должност, врз основа на индиции за сторена дискриминација врз основа на попреченост кон лица со попреченост, од страна на Министерството за социјална политика , демографија и млади и Центри за социјална работа , а во врска со обезбедување услуга за лична асистенција, согласно Законот за социјална заштита“, велат од Комисија за заштита и спречување дискриминација.
Од Комисијата за антидискриминација испратиле допис до ресорното министерство и до Центарот за социјална работа во Кавадарци. Тие имаат рок од 15 дена да одговорат, а врз основа на исказите Комисијата ќе донесе мислење. Ако се утврди дискриминација, ќе бидат донесени препораки до надлежните институции, дополнуваат од Комисијата.
Од Министерството за социјална политика велат дека ќе ја почекаат одлуката на Комисијата и согласно на неа, ќе преземат понатамошни дејствија, доколку се утврди дека се потребни.
Сотир Трајков