Објектот „Пулс“ не бил познат само на полицијата, бил познат на целиот град. Бил познат ина локалната самоуправа, бил познат и на сите надлежни институции кои што требало да функционираат, рече државниот обвинител Љупчо Коцевски во интервју во „Топ тема“ на ТВ Телма.
„Што значи дека 13 години во Кочани не е извршен никаков инспекциски надзор на објектот“, рече Коцевски.
Во однос на полициските службеници кои биле ноќта, додаде Коцевски, „јавното обвинителствот сè уште собира докази зошто отишле, по чиј налог, што презеле и кога се случил пожарот“.
- „Во однос кои се тие полициски службеници и што се дел од истрагата, јавното обвинителство за дел веќе има отворено истрага, меѓутоа еве ќе кажам во моментов, ми јавуваат, дека има издадено наредба за приведување на уште седум полициски службеници и утре ќе бидат изведени пред јавниот обвинител, а потоа и пред судија на претходна постапка“, истакна Коцевски и додаде дека истрагата се проширува.
Телма дознава дека меѓу нив е командир на полициска станица Кочани кој беше разрешен по пожарот во дискотеката, заедно со уште шест други полициски функционери, за да се овозможи непристрасна истрага.
Според информациите на Телма, меѓу приведените се полицајци кои потпишувале сообраќајни решенија за паркинг на кабарето „Пулс“.
Сите седум ново-осомничени се обезбедени од полицијата.
Од министерството за внатрешни, велат дека постапуваат на терен и повеќе информации најавија за утре.