Станови, куќи и викендички чии сопственици се во странство или пак не ги користат во најголемиот дел од годината ќе бидат опфатени со надоместокот „пристап до мрежа“ и со тоа ќе се обезбеди правично распоредување на трошоците кај граѓаните, соопштија од Регулаторната комисија. Оттаму сметаат дека станува збор за луксуз бидејќи енергетските компании се должни да ја одржуваат за тие куќи, станови и викендици да имаат пристап до електрична енергија 365 дена во годината. Вкупниот број кој ќе го опфати оваа мерка е околу 245 илјади броила
Регулаторот Бислимовски е дециден дека не станува збор за нова или дополнителна давачка туку правично распоредување на трошоците а граѓаните кои ќе бидат опфатени ќе плаќаат од 20 до 150 денари повеќе. Мрежарината чествува со 33 отсто во конечната цена на струјата а со воведувањето на „пристапот до мрежа“ ќе се намали до 20 отсто што значи намалување на конечната цена на струјата за 8 отсто кај редовните потрошувачи.
Регулаторите веќе од денес почнуваат со анализа на доставените барања за зголемување на цените од домашните енергетски компании, МЕПСО, МЕМО и Електродистрибуција. Но оттаму напоменуваат дека барањата не се комплетни бидејќи во МЕПСО и Електродистрибуција до крајот на неделава треба да се затворат тендерите за набавка на електрична енергија со која би ги покриле загубите.
ЕСМ веќе соопшти дека цената за мегават час кон универзалниот снабдувач ЕВН ќе биде 57 наместо досегашните 53 евра и дека ќе обезбеди 95 наместо како досега 100 отсто од потребите на австриската компанија.
Одлуката за новата цена ќе ја соопшти универзалниот снабдувач но претходно ќе оди на проверка кај регулаторите кои треба да ја одобрат.
Огнен Чанчаревиќ