Фудбалската федерација на Украина сака да го казни својот поранешен капитен и фудбалер со најмногу настапи во историјата, Анатоли Тимошчук со тоа што ќе ги избрише сите негови постигнувања, бидејќи не сака да го напушти рускиот клуб Зенит.
Тимошчук од 2017 година работи во тимот од Санкт Петербург како помошник тренер, а Украинците се гневни, бидејќи тој ниту еднаш јавно не се огласи за руската инвазија на земјата. Поранешниот фудбалер од средниот ред исто така не сакал да го раскине договорот со Зенит и не се оградил од земјата агресор. Фудбалска федерација јавно најави дека планира да ги избрише сите негови успеси и постигнувања од историјата на Украина и да му ги одземе тренерските лиценци стекнати во татковината.
Во својата богата кариера Тимошчук одигра 144 натпревари за Украина од 2000 до 2016 година. На клупски план има играно за Волин Луцк, Шахтјор Доњецк, Зенит Санкт Петербург, Баерн Минхен и Каират.
