Ракометниот клуб Металург, кој е еден од најтрофејните во нашата држава и редовен учесник во меѓународните купови, одлучи следната сезона да не се натпреварува во Европската лига. Тимот од Автокоманда со освоеното четврто место во Суперлигата доби шанса да игра во квалификациите за второто по ранг клупско натпреварување.
Металург испратил писмо до Ракометната федерација на Македонија дека нема да се пријави за учество во квалификациите за Европската лига. Еден од нашите најтрофејни клубови беше затекнат од паричната гаранција што ЕХФ ја побара од 50.000 евра за учество во натпреварувањето. Слично како и кон Вардар, Европската куќа на ракометот бара гаранција заради стари долгови кон поранешни играчи.
Од Автокоманда велат дека по направените интерни пресметки на буџетот, подобро е следната сезона да се натпреваруваат само во домашното првенство. Минатата сезона Металург се натпреваруваше во Европската лига, но тоа се покажа како скапо задоволство за тимот. Клубот најавува дека парите што требаше да бидат потрошени за Европската лига ќе се искористат за подмирување на старите долгови.
Македонија има еден директен претставник во групната фаза во Европската лига, а Пролет ќе игра квалификации. Сега најверојатно тимот на Бутел ќе го преземе местото на Металург во квалификациите, бидејќи заврши на 5.место на табелата во Суперлигата.
