Неколку месеци пред локалните избори, сè уште не се знае дали ќе се одржат по стари или по нови изборни правила? Министерот за правда вели дека подготовките за измени на Изборниот законик се почнати, но за овој закон се клучни надворешните фактори. Без поддршка од сите партии, тој не може да биде донесен.
Новите измени нема да ги опфатат старите членови со кои е зголемен потребниот број на гласови за независни кандидатури. И покрај тоа што уставните судии одлучија да ја оценуваат нивната уставност, ќе се чека носењето на дефинитивна одлука.
По критиките од опозицијата дека се доцни со реформските закони, Филков денеска објави дека роковите се исполнети во целост, законите се подготвени или се во финална фаза на усвојување. Незадоволен е од тоа што Филипче не ги повлече Чупеска и Михајлова од работната група што треба да работи на законите од правосудството, но нема да ја опструира нивната работа.
Предлог-законот за Судски совет, кој треба да се донесе до крај на јуни, е готов и е доставен за мислење до Венецијанската комисија. Новина во него е и уредување на постапката за разрешување на претседателот на советот, која ќе може да се поведе на барање на најмалку 4 члена, а за разрешување треба да гласаат најмалку осуммина.
Готови се и предлог-законите за јавно обвинителство, за платите на јавните обвинители, а при крај се и измените на Кривичниот зкаоник,Закон за кривична постапка, за судска служба, за прекршоци, како и новиот Кривичен законик што ќе биде испратен на мислење во Европската комисија.
Министерството денеска почна кампања со која ќе се обидат да ја зголемат правната информираност на граѓаните преку јавни настани, работилници и социјалните мрежи.
Далиборка Демјанска Цветановска