Дене се одбележува Денот на македонската полиција – 7 Мај, во Центарот за обука на Министерството за внатрешни работи во Идризово. Оттаму премиерот Христијан Мицкоски се обрати и рече дека „времето кога криминалци слободно се движеле, а институциите биле користени за лични и политички интереси, е завршено“.
Обраќајќи се до граѓаните, Мицкоски порача дека безбедноста не е само статистичка бројка, туку чувство кое го овозможуваат токму полицајците – чувство кога родителите без страв ги пуштаат децата на училиште, кога мајките спокојно се враќаат дома во доцните часови и кога секој граѓанин знае дека државата стои зад него.
„Се сеќаваме – и не смееме да заборавиме – како изгледаше нашето секојдневие пред неколку години. Криминалците се шетаа слободно, државата молчеше, а граѓаните живееја со чувство на немоќ“ вели Мицкоски.
Тој додаде дека претходно институциите се користеле како алатки за лични и политички интереси, а не за правда. Според премиерот тоа време е завршено и во државата веќе нема место за врски, непотизам и заштита од одговорност.
„Законот важи за сите – без разлика дали се работи за обичен граѓанин, функционер или бизнисмен“, рече Мицкоски.
Мицкоски додаде дека силата на државата се мери со тоа дали правдата стигнува до сите, вклучително и до најмоќните и најмаргинализираните.
„Вашата мисија е света – да го чувате поредокот, но и да ја вратите довербата кај народот“, им се обрати премиерот на полициските службеници.