Два приватни Институтa во Скопје се затворени по направената ревизија од страна на Државниот просветен инспекторат (ДПИ). Од Министерството за образование и наука (МОН) за Телма потврдуваат дека станува збор за Институт за бизнис и економија и Самостојна висока стручна школа за мода Фешн дизајн Институт. Министерката за образование и наука, Весна Јаневска денеска од Штип најави дека во моментов се прави и ревизија на уште три институти.
Просветните инспекторати ги чешлаат и универзитети, без разлика дали се приватни и државни. Министерката, Јаневска вели дека веќе се постапува со наплата на казни на рецензенски комисии, декани и ректори.
Инспекторите досега имаа утврдено нерегуларности на тетовскиот Универзитет, на Универзитетот „Св. Апостол Павле“ во Охрид и на универзитетот во Струга. Во Струга се затвори насоката за медицински науки, инспекторите на Тетовскиот Универзитет при надзорот утврдиле и дека има и нелегален избор на двајца наставници. Министерката за образование и наука денеска од Штип најави дека во земјава ќе има осум регионални средни стручни училишта, меѓу кои и штипското електро-машинско училиште „Коле Нехтенин“.
Викторија Јованова