Агенцијата за управување со одземен имот не знае колку чинат запленетите возила, не води сметка каде се, а кога ќе ги продаде, не ги уплаќа сите пари во Буџетот, туку дел си трошеле сами.
Државниот завод за ревизија (ДЗР) утврдил дека од 2011 до 2024 година, Агенцијата продала одземен имот од скоро 27 милиони евра, но во буџетот уплатиле помалку од 20 милиони евра, односно останале за 445 милиони денари или 7 милиони евра покуси.
Во извештајот на државната ревизија се наведува дека Агенцијата не води евиденција за одземените движни предмети кои не може веднаш да ги преземе во своите магацини. Не води сметка каде се наоѓаат, ниту прави попис за нив. Во царинските испостави има 46 запленети возила, а во МВР – 689, но Агенцијата не проценила колку чинат.
Дополнително, Агенцијата не ги третирала рамноправно сите државни институции на кои им дава запленети коли и други предмети.
„Воспоставената пракса на отстапување на конфискуваните предмети и моторни возила не овозможува рамноправност на институциите за користење на истите бидејќи Агенцијата не ги информира институциите од централната и локалната власт, како и формираните ЈП и АД од нивна страна, за одземените предмети со кои располага“, наведува Државниот завод за ревизија.
Ова се само дел од неправилностите што ги утврди Државниот завод за ревизија во работењето на Агенцијата за управување со одземен имот во 2023 година.
Ревизорите, исто така, утврдиле дека магацините и складовите на Агенцијата не ги исполнуваат основните услови за заштита од влага, пожар или штетници на одредени запленети стоки, како лекови, запаливи предмети, мебел, облека или храна. Колите се чуваат на плац по 7-8 години, па веќе се обраснати со трева и скапани.
Срѓан Стојанчов