Најголем број слободни места и најголем интерес кај идните студенти и оваа година бележи Факултетот за информатички науки и компјутерско инженерство-(ФИНКИ). Големиот интерес се должи на популарноста на професијата и можноста за унапредување во истата, вели деканот Јакимовски, современи студиски програми, но и можност квалитетните студенти да бидат вработени навремено и нивниот труд да биде соодветно вреднуван не само кај нас, туку и во светски рамки.
Различни профили на професии, но сите со иста надеж, дека нивните соништа да го студираат тоа што го сакаат ќе биде реалност и опкружување кое вистински ќе ги вреднува нивните квалитети според јасни критериуми.
Според Конкурсот кој УКИМ го објави во јуни, како и во минатите години, најголем број слободни места има на Факултетот за информатички науки и компјутерско инженерство-ФИНКИ (1020), Природно-математичкиот факултет-ПМФ (1030), Филозофскиот со 895 места, Филолошкиот факултет со 790, Правниот со 705 и Економскиот факултет со 700 слободни места.
Резултатите од првиот уписен рок на УКИМ ќе бидат објавени на 3 септември, конечната ранг-листа на 6 септември и на 11 и 12 септември ќе биде запишувањето на примените кандидати. Вториот уписен рок на Скопскиот универзитет е на 17 и 18 септември и третиот на 27 септември 2024.
Нина Стефанова