82 годишната Голубинка Мастева и нејзината сосетка 84 годишната Иванка Павлова од старата штипска населба Исар ја имаа привелегијата први да ги пуштат гласачките ливчиња во кутијата за избор на градоначалник и советници. Почнаа Локалните избори со гласањето на 7.921 болно и немоќно лица во нивните домови.
Гласањето за болните и немоќни лица, за ковид болните, како и во Домовите за стари лица, и затворите се одвива на стариот начин, со уве ламба и спреј, апаратите за отпечаток на прст ќе се пуштат во употреба утре од 7 часот кога се отвараат гласачките места. Тимови од здравствени работници денеска им овозможуваат и на 476 лица болни од ковид или во изолација да гласаат во своите домови.
Ден пред Локалните избори гласаат и осудениците во 13-те казнено поправни установи, каде што своето право на глас можат да го остварат 1.899 гласачи. Гласачките места се отворени во 7 часот, а ќе се затворат во 19 часот.
Денеска, своето право на глас можат да го остварат вкупно 10.653 гласачи. Општинските изборни комисии се подготвени за утре, а на некои избирачки одбори во руралните средини активностите им почнуваат во раните утрински часови, со цел гласачките места да бидат отворени точно во 7 часот.
Раздвижено е денеска пред општинските изборни комисии, членовите на одоборите во придружба со полицијата го носат материјалот на гласачките места, на кои 1 824 863 граѓани можат да го остварат своето избирачко право.
Викторија Димитрова Јованова