Американските медиуми јавуваат дека по упадот на приврзаниците на Трамп во американскиот законодавен дом Капитол, потпретседателот на државата Мајк Пенс е евакуиран и префрлен на тајна безбедна локација.
Од таму потпретседателот ги повика демонстрантите да го запрат насилството и да го напуштат Конгресот.
нападот врз нашиот конгрес нема да биде толериран и вмешаните во него ќе бидат гонети со целата сила на законот, предупреди пенс.
Конгресмените ги напуштија сенатските сали каде усепаја да стигнат и оние што ги пробија полициските барикади. Еден од нив според објавените снимки е качен на говорницата и извикува дека Трамп е победник.
Дел од вработените во Конгресот преку социјални мрежи објавуваат видеа и фотографии од внатре, а на едно видео се гледа како демонстранти облечени и опремени како викинзи стојат пред внатрешен полициски кордон.
Во Конгресот е прекинат процесот за потврдување на изборните резултати од ноемвриските избори. Иако Бајден освои 7 милиони гласови повеќе и стигна до потребната натполовична бројка електори (306), Трамп тврди дека тој победил.
Сите негови жалби се одбиени, а Трамп упати порака до потпретседателот Пенс дека тој може да ги смени резултатите бидејќи по функција е претседавач со Горниот дом на Капитол, Сенатот. Пенс ја одби оваа понуда на Трамп и истакна дека тој само церемонијално ја води седницата за да се потврдат гласовите на граѓаните и изборната волја на американскиот народ.