Не е мал бројот на хоспитализирани пациенти во штипскиот Ковид центар. Утринава пристигнаа повторно боци полни со кислород, за пациентите кои се борат за здив. Во моментов на Инфективниот оддел се 48, четворица се во критична состојба и се на Интезивна нега, а двајца се полесни случиа и чекаат да заминат дома.
Началничката на штипското Инфективно одделение, Дијана Шишкова вели дека за среќа намален е бројот на пациентите во дневната амбуланта, но на оние кои се хоспитализирани им се гледаат компликации од болеста.
Здравствените работници се надеваат дека граѓаните ги почитуваат мерките и празниците ги слават сами во своите домови. Штипскиот градоначалник, кој го раководи и кризниот штаб вели дека според информациите од СВР-Штип штипјани синоќа не се организирале за коледарските огнови. Смета дека оваа дисциплина на граѓаните ќе се покаже и наредните недели со опаѓање на бројките.
Персоналот во Ковид центарот и за празниците ја бие битката со коронавирусот, а утринава ги посетија и децата од Бадниковата поворка, со колачиња, овошје и вода, но и испишани околу 250 Божиќни честитки за пациентите, лекарите, медицинските сестри и техничкиот персонал.
Викторија Димитрова Јованова