Во Основниот кривичен суд Скопје денеска треба да почне судењето против Васил Јованов, осомничен за кривично дело „тешки дела против безбедноста на луѓето и имотот во сообраќајот“ за сообраќајката од јануари годинава на Булеварот „Партизански одреди“ во Скопје во која животот го загуби Фросина Кулакова.
Според обвинението, Јованов, без возачка дозвола и под дејство на алкохол, управувал возило со брзина од 91 километар на час. На пешачки премин, на црвено светло, удрил во Фросина Кулакова, која поминувала прописно. Од силата на ударот, Фросина се здобила со тешки телесни повреди на кои им подлегна.
За делото за кое се товари Јованов е предвидена затворска казна до 20 години. Случајот ќе го води судијката Снежана Марковска. Основното јавно обвинителство Скопје поднесе обвинителен предлог и против таткото на Васил, Зоран Јованов, обвинет дека дозволувал на својот син Васил Јованов да управува патничко моторно возило иако знаел дека синот нема возачка дозвола и е повеќекратен сторител на сообраќајни деликти.