Нема операции во ангиографската сала на Државна клиника за Кардиохирургија бидејќи новиот апарат е претежок за подната конструкција. Министерот Таравари призна дека прво се купил апаратот, а потоа се проверувала конструкцијата. Објасни дека додека да се отвори салата пациентите ќе се препраќаат во приватните болници.
- „Секогаш кога ние набавуваме апарати бараме клиниките да ни кажат што бараат. Тие одлучиле да набават апарат кој е и компјутерска томографија и ангиограф и вистина е дека побарале да се постави на шини за да биде посигурен и со тоа подобро сме со осигурале за да не биде за 2 или 3 тони колку што тежи. Тоа е направено и апаратот веќе е инсталиран“ изјави Арбен Таравари, министер за здравство.
Министерот Таравари кажа дека е формирана стручна комисија за испитување на стручноста на лекарите по смртта на 57-годишниот Тони Ангелковски, кој почина чекајќи низ болничките ходници. Објасни дека ако била направена обдукција ќе се знаело што точно се случило бидејќи пациентот имал и други здравствени проблеми. Семејството обвини за лекарска негрижа и бара одговорност.
Директорот на Фондот за здравствено осигурување вели дека договорите со приватните клиники се активни и тие операции се покриени. Семејството на починатиот пациент пак, тврди дека приватна клиника побарала пари за операција.
- „Двете приватни клиники на почетокот на годината склучија нови договори со Фондот за 2025 година и тие не можат сега во Април да бидат потрошени. Ако воопшто има таков одговор од кој било тоа не е точно“, објасни Сашо Клековски, директор на Фондот за здравствено осигурување.
Државниот санитарен и здравствен инспекторат соопшти дека нема пропусти во документите за пациентот, но утврди дека едната сала не работела и немало стентови и препорача стручен надзор за проверка на лекувањето на пациентот. Министерот најави дека доколку има пропусти во лекувањето ќе има и одговорност. Опозициската СДСМ побара оставка од министерот Таравари обвинувајќи дека ова е хумана катастрофа.
Тамара Марковска