На само еден километар од центарот на Битола, помеѓу станбените комплекси и реонскиот пазар во новиот дел од градот, пред очите на битолчани и надлежните институции, се распаѓа некогаш атрактивниот хотел Битола, во чии рамки функционираше и пензионерски дом. Некогаш репрезентативниот објект со 300 соби за стари лица, но и хотел од отворен карактер, со голем ресторан, банкетна и конференциска сала е само еден од многуте кои сведочат за негрижата за државниот имот. Сликата е страотна, зградата чиј сопственик е Фондот за ПИОМ е необезбедена и собиралиште на сомнителни лица, украдено е се што може да се однесе, инвентарот е искршен, а внатрешноста наликува на депонија. Околните жители стравуваат за нивната безбедност, но велта дека местото веќе е извор на зараза
-На почетокот имаше лица кои што доаѓаа со приколки со коли, крадеа од задните страни. Очигледно се што е со било каква вредност е изнесено однатре и се оди на тотално демолирање на се што е внатре, изјави жител од соседството.
Хотелот со пензионерскиот дом се изградени со средства на пензионерите пред околу половина век. Затворен е во март лани, а ПИОМ неколку пати од 2016 го огласува на продажба, но не се пријави купувач. Битолчани велат во недостиг на старски домови и долги листи на чекање, жално е објектот да се испусти и да не биде ставен во функција.
-Испустен е целиот, требаат домови за стари луѓе, а кај нас нема. Врски да фатиш за старите да одат во дом.
-Ужасно е вака, луѓето патат за дом а ова е се празно, зошто да е така, велат битолчани.
Здружението на пензионери од Битола од минатото лето бара од надлежните институции да им се даде на располагање, со цел да го обноват и адаптираат за престој на стари лица, но не добиле одговор. Одговор нема ниту од ПИОМ и Министерството за труд и социјала на прашањата на Телма какви се намерите со објектот и што ќе се преземе да се запре неговото уништување.
Емилија Мисирлиевски