Четиринаесет месарници пуштиле во промет небезбедна храна, а инспекциските служби на Агенцијата за храна и ветеринарство им изрекоа казни во вредност од 8350 евра. Недоследностите во работењето кај месарниците се утврдени во рамки на 73 спроведени инспекциски надзори на територија на цела држава на 30 април, при што се уништени 323 килограми небезбедна храна, информираат од АХВ. Кај три месарници се констатирани неправилности во означувањето на производите, а кај ист толкав борј е утврдено дека не биле регистрирани како оператори со храна во Агенцијата.
„Со спроведените контроли на месарниците во земјава издадени се 23 решенија за отстранување на утврдени недоследности. Тројца оператори ставале во промет небезбедна храна, кај 7 се утврдени недостатоци во поглед на спроведувањето на правилата на добра производствена и хигиенска пракса, а 4 месарници немале спроведено задолжителен санитарен преглед на вработените“, соопштија од Агенцијата за храна и ветеринарство.
Ваквите контроли на инспекциските служби потврдуваат дека граѓаните јадат и небезбедна, но скапа храна. На 30 април заврши мерката за замрзнати маржи на некои производи. Останува да се види дали по викендот, од утре потрошувачите ќе се соочат со ново покачување на цените. Властите сметаат дека досегашните мерки ја исполниле целта, па нема да има поскапување на храната. Но доколку тоа се случи, најавуваат дека ќе реагираат соодветно, со нови мерки.
Емилија Мисирлиевска