Еврејската заедница во Македонија и Фондот на холокаустот на Евреите од Македонија денеска го одбележаа Јом Хашоа – Национален комеморативен ден на холокаустот и херојството во државата Израел, кој што се одбележува во сеќавање на востанието на Евреите во Варшавското гето во 1943 година и комеморативен ден на шесте милиони Евреи убиени во холокаустот.
Претседателот на Еврејската заедница, Пепо Леви ги запали шесте меморијални свеќи со ветување кон жртвите и преживеаните дека тие никогаш нема да бидат заборавени и дека нивното наследство ќе се одржува во вечна меморија.
„Нацизмот и нацистичките идеи се препознатливи и треба да се уништат веднаш по нивното препознавање, не смее да се дозволи да се скриваат зад демократијата и евентуалните нарушувања на човековите права и слободи. Почитувани токму денес на Јом Хашоа, кога се навршуваат 82 години од херојската епопоеја на востанието на Евреите од Варшавското гето, повторно, по не знам кој пат да го цитирам професорот Ели Визел, добитник на Нобеловата награда за мир, преживеан Евреин од логорот на смртта Аушвиц. Холокаустот е единствен настан, но со универзално значење за целокупното човештво, кој мора секогаш и одново да се памети. Сеќавањето на Холокаустот е единствена шанса за спас на светот од други катастрофи“, порача Пепо Леви, претседател на Еврејската заедница во Македонија.
„Кога и да помислам на Аушвиц, нешто што веднаш ми паѓа на ум се зборовите што ги кажал еден од преживеаните, кој рекол дека има само едно нешто што е пострашно од самиот Аушвиц, доколку светот заборави дека постоело такво место“, изјави Мариуш Бримора, амбасадор на Полска во Македонија.
Нина Стефанова